ഓസ്റ്റിന്‍ (ഷിക്കാഗോ): മൂന്നു വയസുള്ള പെണ്‍കുട്ടിയെ മര്‍ദിച്ചു കൊലപ്പെടുത്തിയ കേസില്‍ കുട്ടിയുടെ അമ്മയുടെ കാമുകനെ പൊലീസ് അറസ്റ്റു ചെയ്തു. കഴിഞ്ഞ ദിവസം കോടതിയില്‍ ഹാജരാക്കിയ ടെറന്‍സ് സ്‌പേയ്‌സിന് ഷിക്കാഗോ കോടതി ഒരു ബില്യന്‍ ഡോളറിന്റെ ജാമ്യം അനുവദിച്ചു.
വെള്ളിയാഴ്ച വൈകിട്ടായിരുന്നു സംഭവം. രാത്രിയോടെ ടെറന്‍സ് സ്‌പേയ്‌സ് കുട്ടിയുടെ അമ്മയെ വിളിച്ച് കുട്ടിക്ക് എന്തോ സംഭവിച്ചുവെന്നും ഏഴുന്നേല്‍ക്കുന്നില്ലെന്നും അറിയിച്ചു. വീട്ടിലെത്തിയ അമ്മ കുട്ടിയെ ആശുപത്രിയില്‍ പ്രവേശിപ്പിച്ചുവെങ്കിലും കുഞ്ഞു മരിച്ചിരുന്നു. ശരീരമാസകലം മുറിവേറ്റ പാടുകള്‍ കണ്ടിരുന്നു. പിന്നീട് നടന്ന പരിശോധനയില്‍ കുട്ടിയുടെ ആന്തരീക അവയവങ്ങള്‍ക്കു കാര്യമായ ക്ഷതമേറ്റിരുന്നതായും കണ്ടെത്തി. കുട്ടിയെ ടെറന്‍സിനെ ഏല്‍പിച്ചാണ് അമ്മ പുറത്തു പോയിരുന്നത്.
വെള്ളിയാഴ്ച സംഭവത്തിനുശേഷം ടെറന്‍സ് വീട്ടില്‍ നിന്നും പുറത്തു പോയി. പൊലീസ് വീട്ടില്‍ വരുമ്പോള്‍ താന്‍ ഇവിടെ ഉണ്ടാകില്ല എന്ന് പറഞ്ഞാണ് ടെറന്‍സ് സ്ഥലം വിട്ടത്. ആറുമാസമായി ടെറന്‍സ് കുട്ടിയുടെ അമ്മയുമായി പ്രണയത്തിലായിരുന്നു. സെപ്റ്റംബര്‍ 12ന് ടെറന്‍സിനെ വീണ്ടും കോടതിയില്‍ ഹാജരാക്കും.
പി.പി ചെറിയാന്‍